అథ నవమోఽధ్యాయః అధ్యాయం ౯

1 ఇదం తు తే గుహ్య-తమం ప్రవక్ష్యామ్యనసూయవే । జ్ఞానం విజ్ఞాన-సహితం యజ్జ్ఞాత్వా మోక్ష్యసేఽశుభాత్ ॥
2 రాజ-విద్యా రాజ-గుహ్యం పవిత్రమిదముత్తమం । ప్రత్యక్షావ-గమం ధర్మ్యం సుసుఖం కర్తుమవ్యయం ॥
3 అశ్రద్దధానాః పురుషాః ధర్మస్యాస్య పరం-తప । అప్రాప్య మాం నివర్తంతే మృత్యు-సంసార-వర్త్మని ॥
4 మయా తతమిదం సర్వం జగదవ్యక్త-మూర్తినా । మత్స్థాని సర్వ-భూతాని నచాహం తేష్వవస్థితః ॥
5 న చ మత్స్థాని భూతాని పశ్య మే యోగమైశ్వరం । భూత-భృన్న చ భూత-స్థో మమాఽత్మా భూత-భావనః ॥
6 యథాఽఽకాశ-స్థితో నిత్యం వాయుః సర్వత్ర-గో మహాన్ । తథా సర్వాణి భూతాని మత్స్థానీత్యుప-ధారయ ॥
7 సర్వ-భూతాని కౌంతేయ ప్రకృతిం యాంతి మామికాం । కల్ప-క్షయే పునస్తాని కల్పాదౌ వి-సృజామ్యహం ॥
8 ప్రకృతిం స్వామవష్టభ్య వి-సృజామి పునః-పునః । భూత-గ్రామమిమం కృత్స్నం అవశం ప్రకృతేర్వశాత్ ॥
9 న చ మాం తాని కర్మాణి నిబధ్నంతి ధనం-జయ । ఉదాసీనవదాసీనం అసక్తం తేషు కర్మసు ॥
10 మయాఽధ్యక్షేణ ప్రకృతిః సూయతే స-చరాచరం । హేతునాఽనేన కౌంతేయ జగద్ విపరి-వర్తతే ॥
11 అవ-జానంతి మాం మూఢా మానుషీం తనుమాశ్రితం । పరం భావమజానంతో మమ భూత-మహేశ్వరం ॥
12 మోఘాశా మోఘ-కర్మాణో మోఘ-జ్ఞానా విచేతసః । రాక్షసీమాసురీం చైవ ప్రకృతిం మోహినీం శ్రితాః ॥
13 మహాత్మానస్తు మాం పార్థ దైవీం ప్రకృతిమాశ్రితాః । భజంత్యనన్య-మనసో జ్ఞాత్వా భూతాదిమవ్యయం ॥
14 సతతం కీర్తయంతో మాం యతంతశ్చ దృఢ-వ్రతాః । నమస్యంతశ్చ మాం భక్త్యా నిత్య-యుక్తా ఉపాసతే ॥
15 జ్ఞాన-యజ్ఞేన చాప్యన్యే యజంతో మాముపాసతే । ఏకత్వేన పృథక్త్వేన బహుధా విశ్వతో-ముఖం ॥
16 అహం క్రతురహం యజ్ఞః స్వధాఽహమహమౌషధం । మంత్రోఽహమహమేవాఽజ్యం అహమగ్నిరహం హుతం ॥
17 పితాఽహమస్య జగతో మాతా ధాతా పితామహః । వేద్యం పవిత్రమోంకారః ఋక్ సామ యజురేవ చ ॥
18 గతిర్భర్తా ప్రభుః సాక్షీ నివాసః శరణం సుహృత్ । ప్రభవః ప్రళయః స్థానం నిధానం బీజమవ్యయం ॥
19 తపామ్యహమహం వర్షం నిగృహ్ణామ్యుత్సృజామి చ । అమృతం చైవ మృత్యుశ్చ సదసచ్చాహమర్జున ॥
20 త్రైవిద్యా మాం సోమ-పాః పూత-పాపాః యజ్ఞైరిష్ట్వాస్వర్గతిం ప్రార్థయంతే । తే పుణ్యమాసాధ్య సురేంద్ర-లోకం అశ్నంతి దివ్యాన్ దివి దేవ-భోగాన్ ॥
21 తే తం భుక్త్వా స్వర్గ-లోకం విశాలం క్షీణే పుణ్యే మర్త్య-లోకం విశంతి । ఏవం త్రయీ-ధర్మమను-ప్రపన్నాః గతాగతం కామ-కామా లభంతే ॥
22 అనన్యాశ్చింతయంతో మాం యే జనాః పర్యుపాసతే । తేషాం నిత్యాభి-యుక్తానాం యోగ-క్షేమం వహామ్యహం ॥
23 యేఽప్యన్య-దేవతా-భక్తాః యజంతే శ్రద్ధయాఽన్వితాః । తేఽపి మామేవ కౌంతేయ యజంత్యవిధి-పూర్వకం ॥
24 అహం హి సర్వ-యజ్ఞానాం భోక్తా చ ప్రభురేవ చ । నతు మామభి-జానంతి తత్త్వేనాతశ్చ్యవంతి తే ॥
25 యాంతి దేవ-వ్రతా దేవాన్ పితౄన్ యాంతి పితృ-వ్రతాః । భూతేజ్యా యాంతి భూతాని యాంతి మద్యాజినోఽపి మాం ॥
26 పత్రం పుష్పం ఫలం తోయం యో మే భక్త్యాప్రయచ్ఛతి । తదహం భక్త్యుప-హృతం అశ్నామి ప్రయతాత్మనః ॥
27 యత్ కరోషి యదశ్నాసి యజ్జుహోషి దదాసి యత్ । యత్తపస్యసి కౌంతేయ తత్ కురుష్వ మదర్పణం ॥
28 శుభాశుభ-ఫలైరేవం మోక్ష్యసే కర్మ-బంధనైః । సంన్యాస-యోగ-యుక్తాత్మా విముక్తో మాముపైష్యసి ॥
29 సమోఽహం సర్వ-భూతేషు న మే ద్వేష్యోఽస్తి న ప్రియః । యే భజంతి తు మాం భక్త్యా మయి తే తేషు చాప్యహం ॥
30 అపి చేత్ సు-దురాచారో భజతే మామనన్య-భాక్ । సాధురేవ స మంతవ్యః సమ్యగ్ వ్యవసితో హి సః ॥
31 క్షిప్రం భవతి ధర్మాత్మా శశ్వచ్ఛాంతిం నిగచ్ఛతి । కౌంతేయ ప్రతి-జానీహి న మే భక్తః ప్రణశ్యతి ॥
32 మాం హి పార్థ వ్యపాశ్రిత్య యేఽపి స్యుః పాప-యోనయః । స్త్రియో వైశ్యాస్తథా శూద్రాః తేఽపి యాంతి పరాం గతిం ॥
33 కిం పునర్బ్రాహ్మణాః పుణ్యాః భక్తా రాజర్షయస్తథా । అనిత్యమసుఖం లోకం ఇమం ప్రాప్య భజస్వ మాం ॥
34 మన్మనా భవ మద్భక్తో మద్యాజీ మాం నమస్కురు । మామేవైష్యసి యుక్త్వైవం ఆత్మానం మత్పరాయణః ॥

ఇతి నవమోఽధ్యాయః