అథ దశమోఽధ్యాయః అధ్యాయం ౧౦

1 భూయ ఏవ మహా-బాహో శృణు మే పరమం వచః । యత్ తేఽహం ప్రీయమాణాయ వక్ష్యామి హిత-కామ్యయా ॥
2 న మే విదుః సుర-గణాః ప్రభవం న మహర్షయః । అహమాదిర్హి దేవానాం మహర్షీణాం చ సర్వశః ॥
3 యో మామజమనాదిం చ వేత్తి లోక-మహేశ్వరం । అసమ్మూఢః స మర్త్యేషు సర్వ-పాపైః ప్రముచ్యతే ॥
4 బుద్ధిర్జ్ఞానమసమ్మోహః క్షమా సత్యం దమః శమః । సుఖం దుఃఖం భవోఽభావో భయం చాభయమేవ చ ॥
5 అహింసా సమతా తుష్టిః తపో దానం యశోఽయశః । భవంతి భావా భూతానాం మత్త ఏవ పృథగ్విధాః ॥
6 మహర్షయః సప్త పూర్వే చత్వారో మనవస్తథా । మద్భావా మానసా జాతాః యేషాం లోక ఇమాః ప్రజాః ॥
7 ఏతాం విభూతిం యోగం చ మమ యో వేత్తి తత్త్వతః । సోఽవి-కంపేన యోగేన యుజ్యతే నాత్ర సంశయః ॥
8 అహం సర్వస్య ప్రభవో మత్తః సర్వం ప్రవర్తతే । ఇతి మత్వా భజంతే మాం బుధా భావ-సమన్వితాః ॥
9 మచ్చిత్తా మద్గత-ప్రాణాః బోధయంతః పరస్పరం । కథయంతశ్చ మాం నిత్యం తుష్యంతి చ రమంతి చ ॥
10 తేషాం సతత-యుక్తానాం భజతాం ప్రీతి-పూర్వకం । దదామి బుద్ధి-యోగం తం యేన మాముపయాంతి తే ॥
11 తేషామేవాను-కంపార్థం అహమజ్ఞాన-జం తమః । నాశయామ్యాత్మ-భావస్థో జ్ఞాన-దీపేన భాస్వతా ॥
అర్జున ఉవాచ
12 పరం బ్రహ్మ పరం ధామ పవిత్రం పరమం భవాన్ । పురుషం శాశ్వతం దివ్యం ఆది-దేవమజం విభుం ॥
13 ఆహుస్త్వామృషయః సర్వే దేవర్షిర్నారదస్తథా । అసితో దేవలో వ్యాసః స్వయం చైవ బ్రవీషి మే ॥
14 సర్వమేతదృతం మన్యే యన్మాం వదసి కేశవ । నహి తే భగవన్ వ్యక్తిం విదుర్దేవా న దానవాః ॥
15 స్వయమేవాత్మనాఽఽత్మానం వేత్థ త్వం పురుషోత్తమ । భూత-భావన భూతేశ దేవ-దేవ జగత్పతే ॥
16 వక్తుమర్హస్యశేషేణ దివ్యా హ్యాత్మ-విభూతయః । యాభిర్విభూతిభిర్లోకాన్ ఇమాంస్త్వం వ్యాప్య తిష్ఠసి ॥
17 కథం విద్యామహం యోగిన్ త్వాం సదా పరి-చింతయన్ । కేషు-కేషు చ భావేషు చింత్యోఽసి భగవన్ మయా ॥
18 విస్తరేణాత్మనో యోగం విభూతిం చ జనార్దన । భూయః కథయ తృప్తిర్హి శృణ్వతో నాస్తి మేఽమృతం ॥
భగవాన్ ఉవాచ
19 హంత తే కథయిష్యామి దివ్యా హ్యాత్మ-విభూతయః । ప్రాధాన్యతః కురు-శ్రేష్ఠ నాస్త్యంతో విస్తరస్య మే ॥
20 అహమాత్మా గుడాకేశ సర్వ-భూతాశయ-స్థితః । అహమాదిశ్చ మధ్యం చ భూతానామంత ఏవ చ ॥
21 ఆదిత్యానామహం విష్ణుః జ్యోతిషాం రవిరంశుమాన్ । మరీచిర్మరుతామస్మి నక్షత్రాణామహం శశీ ॥
22 వేదానాం సామ-వేదోఽస్మి దేవానామస్మి వాసవః । ఇంద్రియాణాం మనశ్చాస్మి భూతానామస్మి చేతనా ॥
23 రుద్రాణాం శంకరశ్చాస్మి విత్తేశో యక్ష-రక్షసాం । వసూనాం పావకశ్చాస్మి మేరుః శిఖరిణామహం ॥
24 పురోధసాం చ ముఖ్యం మాం విద్ధి పార్థ బృహస్పతిం । సేనానీనామహం స్కందః సరసామస్మి సాగరః ॥
25 మహర్షీణాం భృగురహం గిరామస్మ్యైకమక్షరం । యజ్ఞానాం జప-యజ్ఞోఽస్మి స్థావరాణాం హిమాలయః ॥
26 అశ్వత్థః సర్వ-వృక్షాణాం దేవర్షీణాం చ నారదః । గంధర్వాణాం చిత్ర-రథః సిద్ధానాం కపిలో మునిః ॥
27 ఉచ్చైఃశ్రవసమశ్వానాం విద్ధి మామమృతోద్భవం । ఐరావతం గజేంద్రాణాం నరాణాం చ నరాధిపం ॥
28 ఆయుధానామహం వజ్రం ధేనూనామస్మి కామ-ధుక్ । ప్రజనశ్చాస్మి కందర్పః సర్పాణామస్మి వాసుకిః ॥
29 అనంతశ్చాస్మి నాగానాం వరుణో యాదసామహం । పితౄణామర్యమా చాస్మి యమః సంయమతామహం ॥
30 ప్రహ్లాదశ్చాస్మి దైత్యానాం కాలః కలయతామహం । మృగాణాం చ మృగేంద్రోఽహం వైనతేయశ్చ పక్షిణాం ॥
31 పవనః పవతామస్మి రామః శస్త్ర-భృతామహం । ఝషాణాం మకరశ్చాస్మి స్రోతసామస్మి జాహ్నవీ ॥
32 సర్గాణామాదిరంతశ్చ మధ్యం చైవాహమర్జున । అధ్యాత్మ-విద్యా విద్యానాం వాదః ప్రవదతామహం ॥
33 అక్షరాణామకారోఽస్మి ద్వంద్వః సామాసికస్య చ । అహమేవాక్షయః కాలో ధాతాఽహం విశ్వతో-ముఖః ॥
34 మృత్యుః సర్వ-హరశ్చాహం ఉద్భవశ్చ భవిష్యతాం । కీర్తిః శ్రీర్వాక్ చ నారీణాం స్మృతిర్మేధా ధృతిః క్షమా ॥
35 బృహత్సామ తథా సామ్నాం గాయత్త్రీ ఛందసామహం । మాసానాం మార్గ-శీర్షోఽహం ఋతూనాం కుసుమాకరః ॥
36 ద్యూతం ఛలయతామస్మి తేజస్తేజస్వినామహం । జయోఽస్మి వ్యవసాయోఽస్మి సత్వం సత్త్వ-వతామహం ॥
37 వృష్ణీనాం వాసు-దేవోఽస్మి పాండవానాం ధనం-జయః । మునీనామప్యహం వ్యాసః కవీనాముశనా కవిః ॥
38 దండో దమయతామస్మి నీతిరస్మి జిగీషతాం । మౌనం చైవాస్మి గుహ్యానాం జ్ఞానం జ్ఞాన-వతామహం ॥
39 యచ్చాపి సర్వ-భూతానాం బీజం తదహమర్జున । న తదస్తి వినా యత్ స్యాత్ మయా భూతం చరాచరం ॥
40 నాంతోఽస్తి మమ దివ్యానాం విభూతీనాం పరం తప । ఏష తూద్దేశతః ప్రోక్తో విభూతేర్విస్తరో మయా ॥
41 యద్యద్ విభూతి-మత్ సత్వం శ్రీ-మదూర్జితమేవ వా । తత్తదేవావ-గచ్ఛ త్వం మమ తేజోఽంశ-సంభవం ॥
42 అథవా బహునైతేన కిం జ్ఞాతేన తవార్జున । విష్టభ్యాహమిదం కృత్స్నం ఏకాంశేన స్థితో జగత్ ॥

ఇతి దశమోఽధ్యాయః